ஓ மை கடவுளே படத்திற்கு முன்பே எடுக்கப்பட்ட படம்தான் டிக்கிலோனா. சில காரணங்களால் இது அடுத்ததாக வரவேண்டிய சூழலுக்குத் தள்ளப்பட்டுவிட்டது. படத்தின் கதை நேரடியாக 2027-ல் ஆரம்பிக்கிறது. EB-யில் லைன்மேனாக பணி புரிகிறார் மணி (சந்தானம்). மனநல மருத்துவமனைக்கு ஃப்யூஸ் போட வரும் அவருக்கு, அருகே ஒரு இடத்தில் டைம் மிஷின் செய்துகொண்டிருப்பது தெரிய வருகிறது. டைம் மிஷின் இருக்குமே தவிர அங்கிருக்கும் விஞ்ஞானிகளுக்கு அதை இயக்கும் ஃபார்முலா தெரியாது. மணி வருகை தந்திருக்கும் அந்த நேரத்தில் ஒரு விபத்து நடக்க, அங்கு பணியாளாக இருக்கும் ஆல்பர்ட் (யோகி பாபு) ஐன்ஸ்டீனாக மாறி டைம் மிஷினுக்கான ஃபார்முலாவை சொல்லிவிடுவார். இதை பயன்படுத்தி 2020-ல் நடந்த தனது திருமணத்தை நிறுத்த முடிவு செய்கிறார் மணி. 7 வருட காலம் வாழ்ந்து முடித்த இவருக்கு தனக்கான ஜோடி ப்ரியா (அனகா) இல்லை என முடிவு செய்கிறார்.  இங்கிருந்து போகும் மணி அங்கிருக்கும் மணியிடம் 7 வருட காலம் அவர் அனுபவித்த கொடுமைகளை சொல்லி 2020 மணியை 2027-க்கு அனுப்பி ஒரு வார காலம் வாழச் சொல்கிறார். ஒரு வாரம் கழித்து தலை தெறிக்க ஓடி வந்து கல்யாணத்தை நிறுத்தியும் விடுகிறார். நிறுத்துவது மட்டுமல்லாமல் ப்ரியாவின் தோழியான மேக்னாவை (ஷிரின்) திருமணம் செய்ய முடிவெடுக்கிறார். கடைசியில் அந்த வாழ்க்கையும் நன்றாக அமையவில்லை. இப்படி குழப்படியும் குளறுபடியும் போய்க்கொண்டிருக்கும் மணியின் வாழ்க்கை இறுதியில் என்னவானது என்பதே கதை.