நாம் தமிழர் பிரித்தது யாருடைய வாக்குகளை? #DataStory

234 தொகுதியிலும் போட்டியிட்ட நாம் தமிழர், 2,958,458 வாக்குகள் பெற்று மூன்றாவது பெரிய கட்சியாக உருவெடுத்துள்ளது.  இது ஒட்டுமொத்த வாக்குப் பதிவில் 6.85%.

2016 சட்டமன்றத்தேர்தலில் 1.07%, 2019 நாடாளுமன்றத் தேர்தலில் 3.90% இந்தத் தேர்தலில் 6.85% என தேர்தலுக்குத் தேர்தல் வளர்ந்து வருகிறது.

கடந்த தேர்தல்களில் நோட்டாவுடன் போட்டிபோடும் கட்சி என விமர்சிக்கப்படும் நாம் தமிழர் கட்சி, இந்த முறை ஒரு தொகுதியில்கூட நோட்டாவுக்குக் குறைவான வாக்குகள் வாங்கவில்லை.

4 தொகுதியில் மட்டுமே 5,000-க்கும் குறைவான வாக்குகளைப் பெற்றிருக்கிறது. 167 தொகுதிகளுக்கு மேல் 10,000-த்துக்கும் அதிகமாக வாக்குகளைப் பெற்றிருக்கிறது.

177 தொகுதிகளில் தி.மு.க, அ.தி.மு.க கூட்டணி கட்சிகளுக்கு அடுத்தபடியாக மூன்றாவது இடத்தைப் பிடித்துள்ளது. ஒரு தொகுதியில் கூட நான்காவது இடத்துக்கு கீழ் போகவில்லை. அதே நேரம் எந்தத் தொகுதியிலும் இரண்டாம் இடத்தையும் பிடிக்கவில்லை.

நாம் தமிழர் கட்சி, தி.மு.க வாக்குகளைப் பிரிப்பதற்காகவே செயல்படுகிறது என்ற விமர்சனம் அடிக்கடி வைக்கப்படும். உண்மையில் இந்த தேர்தல் டேட்டாவைப் பார்க்கும்போது அ.தி.மு.க-வின் வாக்குகளைப் பிரித்ததாகவே தெரிகிறது. எப்படி?

82 தொகுதிகளில் வெற்றி பெற்றவரின் வாக்குகளுக்கும் இரண்டாவதாக வந்தவரின் வாக்குகளுக்குமான வித்தியாசத்தைவிட நாம் தமிழர் பெற்ற வாக்குகள் அதிகம். இதில் 56 தொகுதிகளில் தி.மு.க-வும், 26 தொகுதிகளில் அ.தி.மு.க-வும் வெற்றி பெற்றிருக்கின்றன.

அதாவது தி.மு.க வென்ற அந்த 56 தொகுதிகளில் நாம் தமிழரின் வாக்குகள் அ.தி.மு.க-வுக்கு கிடைத்திருந்தால் அ.தி.மு.க வென்றிருக்கும்.