#HBDRaina - `சின்ன தல' ரெய்னாவின் டாப் 10 இன்னிங்ஸ்கள்!

இங்கிலாந்துக்கு எதிராக 2006-ம் ஆண்டு நடந்த மூன்றாவது ஒருநாள் போட்டியில் சுரேஷ் ரெய்னா 89 ரன்கள் விளாசினார். 92 ரன்களில் முக்கிய வீரர்கள் பெவிலியனுக்கு திரும்பிய நேரத்தில் ரெய்னா - தோனி கூட்டணி களத்தில் நின்று கலக்கியது.

தென்னாப்பிரிக்காவுக்கு எதிராக 2010-ம் ஆண்டு நடந்த டி20 போட்டியில் அதிரடியாக களம் இறங்கிய ரெய்னா 101 ரன்கள் அடித்தார்.

ஆஸ்திரேலியாவுக்கு எதிராக 2010-ம் ஆண்டு நடந்த ஒருநாள் போட்டி ஒன்றில் ஆஸ்திரேலிய அணி மிகச்சிறப்பாக விளையாடி 289 ரன்களை குவித்தது. இந்தப் போட்டியில் ஆஸ்திரேலிய அணி வெற்றிபெற அதிக வாய்ப்புகள் இருந்தபோது ரெய்னாவின் 71 ரன்கள் அணியின் வெற்றிக்கு வழிவகுத்தது.

ஆஸ்திரேலியாவுக்கு எதிராக 2011-ம் ஆண்டு நடந்த உலகக்கோப்பை காலிறுதிப் போட்டியில் ரெய்னா 34 ரன்களை அடித்தார். இந்த ரன் மிகவும் குறைவானதாக இருக்கலாம். ஆனால், அந்தப் போட்டியில் திருப்புமுனையை ஏற்படுத்தியது ரெய்னாவின் இந்த ரன்தான்.

மேற்கிந்திய தீவுகளுக்கு உலகக்கோப்பை வென்ற கையோடு 2011-ம் ஆண்டு சுற்றுப்பயணம் மேற்கொண்ட இந்திய அணி டெஸ்டில் கடுமையான திணறியது. அந்த போட்டியில் மொத்த பாரத்தையும் தோளில் சுமந்து பொறுப்போடு விளையாடி 82 ரன்கள் விளாசினார்.

பாகிஸ்தானுக்கு எதிராக 2011-ம் ஆண்டு நடந்த உலகக்கோப்பை அரையிறுதிப் போட்டியில் 38-வது ஓவரில் 187/5 என்ற நிலையில் இருந்தபோது அணியின் ரன்னை பொறுமையுடன் விளையாடி இந்திய அணி இறுதிப்போட்டிக்குச் செல்ல எண்ட்ரி கார்டு கொடுத்தது, ரெய்னாதான். இந்த போட்டியில் ரெய்னா 36 ரன்கள் எடுத்திருந்தார்.

இங்கிலாந்துக்கு எதிராக 2014-ம் ஆண்டு நடந்த ஒருநாள் போட்டியில் 100 ரன்களை ரெய்னா விளாசினார். அப்போதும் இந்திய ரசிகர்களுக்கு நம்பிக்கை அளித்தது தோனி - ரெய்னா கூட்டணிதான்.

ரெய்னாவைப் பற்றி பேசும்போது ஐபிஎல் தொடரினைப் பற்றி பேசாமல் இருக்க முடியுமா? அதுவும் பஞ்சாப் அணிக்கு எதிராக 87 ரன்கள் விளாசிய போட்டியை மறக்க முடியுமா? 2014-ம் ஆண்டு நடந்த ஐ.பி.எல் போட்டியில் இரண்டாவது குவாலிஃபையர் போட்டியில் ரெய்னா 16 பந்துகளில் அரைசதம் அடித்தார். ஆனால், அந்தப் போட்டியில் சென்னை தோல்வியடைந்தது. வீரனின் வாழ்வில் வெற்றியும் தோல்வியும் சகஜம்தானே!

ஜிம்பாப்பே அணிக்கு எதிராக 2015-ம் ஆண்டு நடந்த உலகக்கோப்பை போட்டி சம்பிரதாயமாக பார்க்கப்பட்டாலும் அந்தப் போட்டியில் ஜிம்பாப்பே சிறப்பாக விளையாடியது. இந்திய அணி 23 வது ஓவரில் 92 ரன்களில் திணறிய போது ரெய்னா - தோனி கூட்டணி நின்று விளையாடி அணியை வெற்றிப்பாதைக்கு இழுத்துச் சென்றது.

டெல்லி அணிக்கு எதிராக இந்த ஆண்டு நடந்த ஐ.பி.எல் போட்டியில் சுரேஷ் ரெய்னா 36 பந்துகளில் 54 ரன்கள் விளாசினார். இதனை, ரெய்னாவின் பெஸ்ட் கம்பேக் என ரசிகர்கள் சமூக வலைதளங்களில் கொண்டாடி தீர்த்தனர்.