Silk Smitha: குருநாதர்... நிறைவேறாத ஆசை - நடிகை சில்க் ஸ்மிதா வாழ்வின் 12 சுவாரஸ்யங்கள்!

நடிகர் வினு சக்கரவர்த்தியின் உதவியால்தான் சில்க் ஸ்மிதாவுக்கு `வண்டிச் சக்கரம்’ என்ற திரைப்படத்தில் நடிக்கும் வாய்ப்பு கிடைத்தது. சில்க் ஸ்மிதாவின் குருநாதராகவே வினு சக்கரவர்த்தி இருந்துள்ளார். இருவருக்கும் இடையில் இருந்த உறவு தவறானது என சித்திரித்து எழுதிய பத்திரிக்கைக்கும் தனது அதிருப்தியை தெரிவித்தார்.

இந்திய திரையுலகமே கொண்டாடிய சில்ஸ் ஸ்மிதாவை “Who is this ‘Silk!?” என அப்போதைய பிரதமர் இந்திராகாந்தி கேட்ட நிகழ்வும் உண்டு.

ஷூட்டிங் ஸ்பாட்டில் ஒருநாள் சில்க் ஸ்மிதா கடித்து போட்ட ஆப்பிளை எடுக்க ரசிகர்கள் கூட்டம் சண்டையிட்டதாம். அதனால், அந்த ஆப்பிளை ஏலம் விட்டுள்ளனர். ரூ.2 மதிப்புள்ள அந்த ஆப்பிளை 120 ரூபாய்க்கு சில்க் ஸ்மிதாவின் தீவிர ரசிகர் ஒருவர் ஏலம் எடுத்தாராம்.

ஆணவமிக்கவராகக் கருதப்பட்ட சில்க் ஸ்மிதா சிவாஜியுடன் ஒரு படத்தில் நடித்தார். ஷூட்டிங்கில் சிவாஜி செட்டுக்கு வந்தபோது சில்க் ஸ்மிதாவைத் தவிர அனைவரும் எழுந்து நின்றிருக்கிறார்கள். சிவாஜிக்கு உரிய மரியாதை தரவில்லை என்றும், `என்ன ஒரு ஆணவம்’ எனவும் கடுமையான விமர்சனங்களை அவர் சந்தித்தார். ஆனால், சில்க் ஸ்மிதாவோ, ``நான் எழுந்து நின்றால், எனது ஆடையைப் பார்த்து சிவாஜி சார் சங்கடப்பட நேரிட்டிருக்கலாம்” என்று விளக்கம் கொடுத்தாராம்.

 `கவர்ச்சிக் கன்னி’ என இந்தியத் திரையுலகமே அவரைக் கொண்டாடி இருந்தாலும், தன்னை சிறந்த நடிகையாக ரசிகர்கள் கொண்டாடவில்லை என சில்க் ஸ்மிதாவுக்கு எப்போதும் வருத்தம் இருந்ததாம்.

கமல்ஹாசனிடம் அவரது தந்தை, ``உன்னைவிட பெரிய நடிகரை எனக்கு அறிமுகப்படுத்து” என்று கூறியுள்ளார். அதற்கு கமல்ஹாசன், சில்க் ஸ்மிதாவை அழைத்து சென்று அறிமுகப்படுத்தியதாகவும் தகவல் உண்டு.

``உங்களுக்கு நிறைவேறாத ஆசை ஏதேனும் இருக்கிறதா?” என பத்திரிக்கையாளர் கேட்டதற்கு, ``நான் நக்சலைட் போராளியாக ஆசைப்பட்டேன். ஆனால், என்னுடைய வாழ்க்கை திசைமாறிப்போனது. இருந்தாலும் அந்தத் தீ என்னுள் இன்னும் எரிந்துகொண்டுதான் இருக்கிறது” என்று பதிலளித்திருக்கிறார் சில்க்.

தனது சொந்த ஊரில் பண்ணையார்களுக்கு எதிராகப் போராடிய எளிய மக்களுக்கு ஆதரவாக நின்று அவர்களுக்கு பண உதவியும் செய்திருக்கிறார்.

சில்க் ஸ்மிதாவை எப்போதுமே இயக்குநர்கள், இன்னும் சிறியதாக உடை அணியச் சொல்வார்களாம். ஆனால், இயக்குநர் ராஜ் கபூரோ குட்டியான உடையில் வந்த சில்க்கை பார்த்து, நடிகைக்கு நிகராக உடை அணியச் சொன்னாராம்.

மதுரை ஆதீனமாக இருந்த அருணகிரிநாதர் ஒரு பேட்டியில், ``எனக்கு அழகு இருக்கிறது. புகழ் இருக்கிறது. பணம் இருக்கிறது. ஆனால், நிம்மதி இல்லை” என சில்க் ஸ்மிதா தன்னிடம் புலம்பியதாகத் தெரிவித்தார்.

திருமணம் செய்து கொண்டு சாதாரணமாக செட்டில் ஆக வேண்டும் என்ற சில்க் ஸ்மிதாவின் ஆசை கடைசி வரை நிறைவேறாமலே போனது.

தமிழ், தெலுங்கு, மலையாளம் இந்தி உள்ளிட்ட மொழிகளில் மொத்தம் 450-க்கும் மேற்பட்ட படங்களில் நடித்துள்ள சில்க் ஸ்மிதா தற்கொலை செய்துகொண்டதாக அறிவிக்கப்பட்ட பின்னர், அவரது உடல் ராயப்பேட்டை அரசு மருத்துவமனையில்  கேட்பாரின்றி அநாதையாக வைக்கப்பட்டிருந்ததாகவும் சொல்லப்படுவதுண்டு.