ரியல் Rolex.. பாப்லோ  எஸ்கோபார் கதை!

விக்ரம் படத்தில் போதைப்பொருள் கடத்தல் மன்னனான Rolex கேரக்டரில் நடிகர் சூர்யா நடித்திருப்பார். மூன்று நிமிடங்களே வந்துபோனாலும் திரையில் மாஸ் காட்டியிருப்பார் சூர்யா...

அப்படி, ரியல் லைஃபில் 1980 - 1990-களின் தொடக்கம் வரை கொகைன் போதைபொருள் கடத்தலில் கொடிகட்டிப் பறந்த கொலம்பிய கடத்தல் மன்னன் பாப்லோ எஸ்கோபார் பற்றிதான் தெரிஞ்சுக்கப் -போறோம்.

கொலம்பியாவின் ரியோநெர்கோ பகுதியில் ஏழை விவசாயியான ஏபெல் டி எஸ்கோபர் – தொடக்கப் பள்ளி ஆசிரியையான ஹெர்மில்டா காவிரோ பெரியோ தம்பதியின் ஏழு குழந்தைகளின் மூன்றாவது குழந்தையாக 1949 டிசம்பர் 1-ம் தேதி பிறந்தவர் பாப்லோ எஸ்கோபர்.

டீனேஜிலேயே குற்றசெயல்களில் ஈடுபடத் தொடங்கிய பாப்லோவுக்கு, தனது 22 வயதில் ஒரு மில்லியன் கொலம்பிய டாலர்களைச் சேர்த்து பெரிய பணக்காரனாக வேண்டும் என்பது சிறுவயது லட்சியமாக இருந்திருக்கிறது. அவருக்கு 26 வயது முடிந்தபோது, அவரது வங்கிக் கணக்கில் 100 மில்லியன் கொலம்பிய டாலர்கள் இருந்ததாகச் சொல்கிறார்கள்.

தொடக்க காலங்களில் தனது நண்பன் ஆஸ்கருடன் இணைந்து ஆள் கடத்தல், கார் திருட்டு, போலி லாட்டரி சீட்டுகள், சிகரெட் விற்பது போன்ற நடவடிக்கைகளில் பாப்லோ ஈடுபட்டிருக்கிறார். 1975-க்குப் பிறகு கொகைன் போதைப் பொருள் கடத்தலில் ஈடுபடத் தொடங்கிய அவர், கார்லோஸ் லெடருடன் இணைந்து ‘Medalin Cartel’ என்ற போதைப்பொருள் கடத்தல் கும்பலை உருவாக்கியிருக்கிறார்.

உங்க ரெகுலர் வேலைகளை பார்க்குறப்போவே  ஜாலியான தகவல்களையும் தெரிஞ்சுக்கணுமா? தமிழ்நாடு நவ் பாட்காஸ்ட் கேளுங்க! மிஸ் பண்ணவே கூடாத ரகளையான மூணு சீரீஸ் வருது!

சர்வதேச சந்தையில் மிகப்பெரிய மதிப்பு கொண்ட கொகைனை அமெரிக்காவுக்குள் முதல்முதலில் கடத்திக் கொண்டுபோய் விற்பனை செய்யும் தொழிலில் 1980-கள் தொடங்கி 1990-களின் தொடக்கம் வரை மெடலின் கார்ட்டல் கொடிகட்டிப் - பறந்தது.

அமெரிக்காவில் கொகைன் தேவை அதிகரிக்கத் தொடங்கவே, ஈகுவடார் உள்ளிட்ட தென்னமெரிக்க நாடுகளில் இருந்து கொகைனின் மூலப்பொருளை கொலம்பியா கொண்டுவந்து, அதை பவுடராக்கி அமெரிக்காவுக்குக் கடத்தத் தொடங்கினர். ஒரு கட்டத்தில் மெடலின் கார்ட்டலின் வாராந்திர வருமானம் மட்டுமே 423 மில்லியன் அமெரிக்க டாலர்கள் (இன்றைய மதிப்பில் தோராயமாக ரூ.31,69,21,75,200) அளவுக்கு எகிறியிருக்கிறது.

1976-ல் ஈகுவடாரில் இருந்து 18 கிலோ கொகைன் பேஸ்டோடு கொலம்பியா வந்த பாப்லோ கைது செய்யப்படுகிறார். லஞ்சம் கொடுத்து வழக்கிலிருந்து அவர் தப்ப முயன்ற நிலையில், அது முடியாமல் போனது. இதையடுத்து, தன்னைக் கைது செய்த இரண்டு அதிகாரிகள், விசாரணை நீதிபதி என வழக்கில் தொடர்புடையவர்கள் அனைவரும் அடுத்தடுத்து படுகொலை செய்யப்பட்டனர். இதனால், அவர் மீதான வழக்கு கைவிடப்பட்டது.

தென் அமெரிக்க நாடுகளில் ஒரு கிலோ கொகைனை உற்பத்தி செய்ய 1,000 டாலர்கள் செலவான நிலையில், அவை அமெரிக்க சந்தைகளில் 70,000 டாலர்களுக்கு விற்கப்பட்டது. ஒரு கட்டத்தில் கொலம்பியாவின் மெடலின் நகரில் இருக்கும் ஒவ்வொருமே பாப்லோவுக்காக வேலை செய்துகொண்டிருக்கும் நிலை ஏற்பட்டது. 1986-ல் கொலம்பிய நாடாளுமன்ற உறுப்பினரானார் பாப்லோ.

1989-ல் உலகின் ஏழாவது பணக்காரராக பாப்லோவை ஃபோர்ப்ஸ் இதழ் பட்டியலிட்டது. இது உலக அளவில் பாப்லோவின் பெயர் பிரபலமடையக் காரணமாகியது. அதுவரை பெரிதாக வெளியில் தெரியாத பாப்லோவின் மெடலின் கார்ட்டல் பற்றிய விவாதம் சர்வதேச நாடுகள் மத்தியில் ஏற்பட்டது. அமெரிக்க அரசின் மோஸ்ட் வாண்டட் லிஸ்டில் நம்பர் ஒன் இடத்தைப் பிடித்தார் பாப்லோ.

உங்க Favourite Celebrities பத்தின  1000+ Super Cool தகவல்கள் படிக்க 7WOWFacts Android app Install பண்ணுங்க!

போதைப் பொருள் கடத்தலுக்குத் தடையாக இருப்பவர்களை லஞ்சம், கடத்தல் அல்லது கொலை என இந்த மூன்று முறைகளில் மெடலின் கார்ட்டல் எதிர்க்கொண்டது. கொலம்பிய போலீஸ் தலைமையகம், உச்ச நீதிமன்றம் என அரசின் முக்கிய இடங்கள் உள்பட பல இடங்களில் இந்த கும்பல் வெடிகுண்டுத் தாக்கல் நடத்தியிருக்கிறது. சுமார் 4,500 பேரின் மரணத்துக்கு பாப்லோ காரணமாக இருக்கக் கூடும் என்று சொல்லப்படுகிறது.

1990 கொலம்பிய அதிபர் தேர்தலில் போட்டியிட்ட லூயிஸ் கார்லோஸ் கலான், வெளிப்படையாகவே பாப்லோவை எதிர்த்தார். ’குற்றவாளியான பாப்லோவை அமெரிக்காவுக்கு நாடு கடத்த வேண்டும்’ என்று பொதுக்கூட்டம் ஒன்றில் பேசியிருந்தார்.

இந்தசூழலில், 1989 ஆகஸ்ட் 18-ல் பொதுக்கூட்டம் ஒன்றில் பேசிக்கொண்டிருந்த கலான், துப்பாக்கிச் சூட்டில் படுகொலை செய்யப்பட்டார். பாப்லோ எதிர்ப்பில் முக்கியமானவரான கொலம்பிய சட்டத்துறை அமைச்சர் ரோட்ரிகோ லாரா என்பவரும் படுகொலை செய்யப்பட்டார்.

இந்த விவகாரத்தை அடுத்து கொலம்பிய அரசுக்கு எழுந்த சர்வதேச அழுத்தத்தால் பாப்லோவைக் கைது செய்ய அரசு முயன்றது. இதனால், தலைமறைவான பாப்லோ, ஒரு கட்டத்தில் அரசோடு சமாதானம் பேசினார். தன்னை அமெரிக்காவுக்கு நாடு கடத்தக் கூடாது என்று நிபந்தனை விதித்த அவர், மெடலின் புறநகர் பகுதியில் தனக்குத் தானே கட்டிக் கொண்ட La Catedral என்று சொகுசு சிறையில் ஐந்து ஆண்டுகள் அடைபட்டுக் கொள்வதாக அரசை சமாதானப்படுத்தினார்.

சிறை என்று அடையாளப்படுத்தப்பட்ட அந்த காம்பவுண்டில் கால்பந்து மைதானம், பொம்மை அருங்காட்சியகம், மதுபானக்கூடம் என பல்வேறு வசதிகள் இருந்ததால், ஹோட்டல் எஸ்கோபர் அல்லது மெடலின் கிளப் என்றும் அழைக்கப்பட்டது. இதுகுறித்த தகவல்கள் ஊடகங்களில் கசிந்த நிலையில், 1992 ஜூலையில் அவரை சாதாரண சிறைக்கு மாற்ற கொலம்பிய அரசு முயற்சித்தது. ஆனால், இதை முன்கூட்டியே தெரிந்துகொண்ட பாப்லோ, 1992 ஜூலை 22-ல் லா கதீட்ரல் வளாகத்தில் இருந்து தப்பினார்.

பாப்லோ தப்பிய பின்னர், அவரைப் பிடிப்பதற்காக சிறப்பு அதிரடிப் படையை அமெரிக்கா கட்டமைத்தது. அத்தோடு, அவரின் எதிரிகள் ஒன்றுகூடி Los Pepes என்ற அமைப்பையும் நிறுவினர். இவர்கள் பாப்லோவுக்கு எதிரான வன்முறையைக் கையிலெடுத்தனர். மெடலின் கார்ட்டலுக்கு எதிராகப் போதைப்பொருள் கடத்தலில் ஈடுபட்டுக் கொண்டிருந்த கலி கார்ட்டல் உள்ளிட்ட கும்பல்கள் இவர்களுக்கு நிதி உதவி அளித்தன.

இவர்கள் பாப்லோவுக்கு நெருக்கமான குடும்ப உறுப்பினர்கள், நண்பர்கள், வழக்கறிஞர்கள் என 300-க்கும் மேற்பட்டோரைக் கொன்று குவித்தனர். மெடலின் புறநகர்ப் பகுதியில் பதுங்கியிருந்த பாப்லோ, தனது 44-வது பிறந்தநாள் முடிந்த மறுநாள் 1993 டிசம்பர்  2-ல் கொலம்பிய போலீஸாரால் சுட்டுக் கொல்லப்பட்டார்.

உலக வரலாற்றில் பணக்கார கிரிமினலாகக் கருதப்படும் பாப்லோ எஸ்கோபர் வாழ்வு குறித்து பல்வேறு திரைப்படங்கள், வெப் சீரிஸ்கள் வெளிவந்திருக்கின்றன. நெட்ஃபிளிக்ஸில் வெளியான நார்கோஸ் வெப் சீரிஸ் அந்த வகையில் ரொம்பவே பேமஸானது.