விருதுநகர், மல்லாங்கிணறில் தொழில்துறை அமைச்சர் தங்கம் தென்னரசு முன்னிலையில் அ.தி.மு.க-வைச் சேர்ந்த மாவட்ட எம்.ஜி.ஆர் மன்ற துணைச் செயலாளர் முத்துசாமி, மாவட்ட தகவல் தொழில்நுட்பப் பிரிவு இணைச் செயலாளர் சிவானந்த அருள்மொழிவர்மன், முன்னாள் மாவட்ட மாணவரணி துணைச் செயலாளர் ராஜா உள்ளிட்ட நிர்வாகிகள் தி.மு.க-வில் இணைந்தனர். ரைட்டு!

தேனி, கம்பம் நகராட்சியில் மணிகண்டன் என்ற தூய்மைப் பணியாளர், மேற்பார்வையாளர் ஜோதி முருகனிடம் விடுப்பு கேட்டுள்ளார். ஜோதி முருகன் இதனை மறுக்கவே, மனமுடைந்த மணிகண்டன் விஷம் குடித்து உயிரிழந்தார். இதனையடுத்து, உறவினர்கள் மற்றும் சக ஊழியர்களின் போராட்டத்தையடுத்து ஜோதி முருகன் கைது செய்யப்பட்டிருக்கிறார். சோகம்!

திருச்சி, அல்லூர் சிவன் கோயில் வளாகத்தில் கிராம சபை கூட்டம் நடைபெற்றது. அதில், அல்லூர் மேலச்சேரியைச் சேர்ந்த ஆனந்த் என்பவர் கேள்வி கேட்டபோது ஊராட்சி மன்றத் தலைவர் விஜயேந்திரன் அவரை சாதிப்பெயர் சொல்லி திட்டியதாகக் கூறப்படுகிறது. இதுதொடர்பாக போலீஸில் புகார் அளிக்கப்பட்டு நடவடிக்கை எடுக்கப்பட்டுள்ளது. இதெல்லாம் எப்போ மாறும்!

மதுரையைச் சேர்ந்த நெரியா மோனிகா என்ற 9 வயது சிறுமி, சிறு வயது முதலே புத்தகங்கள் வாசிப்பதை வழக்கமாகக் கொண்டுள்ளார். இதுவரை, 500-க்கும் மேற்பட்ட புத்தகங்களைப் படித்து முடித்த இவர், 74 புத்தங்களுக்கு ரிவ்யூ கொடுத்துள்ளார். புத்தகத்தில் உள்ள பாசிட்டிவ் தகவல்கள், புத்தகத்தின் சாராம்சம் போன்றவற்றை `jar of review’ என்ற இன்ஸ்டாகிராம் பக்கத்தில் பதிவிட்டும் வருகிறார். சூப்பர்!