குன்றத்தூர், அரசு ஆரம்ப சுகாதார நிலையத்தில் தினமும் நூற்றுக்கணக்கானோர் சிகிச்சைக்காக வருகின்றனர். இங்கு எக்ஸ்-ரே இயந்திரம் பழுது, குழந்தை நல மற்றும் அறுவை சிகிச்சை மருத்துவர் இல்லாதது என பல பிரச்னைகளால் நோயாளிகள் சரியாக சிகிச்சைப் பெற முடியாமல் தவித்து வருகின்றனர். நோயாளிகள் பாவம்!

ஒட்டன்சத்திரம் பஸ் ஸ்டாண்ட் பகுதியில் பொதுமக்கள் திறந்த வெளியில் நின்று, வெளியூர் செல்லும் பஸ் ஏறுகின்றனர். மழை, வெயில் காலங்களில் அதிகமாக சிரமப்படுகின்றனர். இதனால், அப்பகுதியில் பயணியர் நிழற்குடை அமைக்க வேண்டும் என மக்கள் கோரிக்கை விடுத்துள்ளனர். அதிகாரிகள் கவனத்துக்கு!

விருதுநகர் மாவட்டத்தில் கிராமம் மற்றும் நகரம் என பல பகுதிகளில் சிக்னல்கள் சரியாக செயல்படாததால் போக்குவரத்து நெரிசல் அதிகமாகக் காணப்படுகிறது. போக்குவரத்து போலீஸார் குறைவாக இருப்பதால், இந்த நெரிசலைக் கட்டுப்படுத்த முடியவில்லை என கூறப்படுகிறது. சிக்னல்கள் சீரமைக்கப்படுமா?

மயிலாடுதுறை, பெரும்பூர் கிராமத்தைச் சேர்ந்த விவசாயி, பாலமுருகன். இவர் தனது வீட்டு மாடியிலேயே நாற்றங்கால் வளர்த்து பலரது கவனத்தையும் ஈர்த்துள்ளார். சேற்றுக்குப் பதிலாக தேங்காய் நார், மரத்தூள் போன்றவற்றைப் பயன்படுத்தி விதைகளைப் பரப்பி நாற்றுகளை உருவாக்கியுள்ளார். சூப்பர்!

திருச்சி, பெரமங்கலம் ஊராட்சியில் கடந்த சில வாரங்களாக மக்கள் அன்றாடம் குடிக்கும் குடிநீரில் செம்மண் கலந்து வருவதால் அப்பகுதி மக்கள் கவலையில் உள்ளனர். இதனால், மக்களுக்கு உடல்நலப் பிரச்னைகளும் ஏற்பட்டு அவதிப்படுகின்றனர். அதிகாரிகள் கவனத்துக்கு!

பூந்தமல்லி போலீஸ் நிலையத்தில் பெண் காவலராகப் பணிபுரிந்து வருபவர் அனுசியா. தங்களுடைய குடும்பத்தில் ஒருவராக நினைத்து, காவல் நிலைய ஆய்வாளர் சிதம்பரம் முருகேசன் உள்ளிட்ட போலீஸார் கர்ப்பிணியான அவருக்கு வளைகாப்பு விழா நடத்தி, பெற்றோருடன் அனுப்பி வைத்துள்ளனர். செம!